Një Komb
Një Atdhe
Një Gjuhë
Një Flamur

NJOFTIM

Prishtinë 7 shtator 2010
Dega e OVL të UÇK-së në Gjakovë, ju fton që të merrni pjesë në ankandin publik, ku do të shiten pikturat e piktorit të nderuar z.Iljaz Avdiu. Ankandi ka qëllim humanitar dhe të ardhurat i dedikohen veteranëve të UÇK-së, të pastrehë.
Ankandi mbahet në Sheshin 21 në Prishtinë me 7 shtator 2010, duke filluar nga ora 20:00. I njëjti do të transmetohet në TV21.
Për këtë fond është hapur edhe xhirollogaria: Banka Ekonomike nr. 1402-00000-1775938




Përkujtohen Dëshmorët e Brigadës 121 Kumanova

Kleçkë 25 gusht 2010
Në 12 vjetorin e rënies së komandantit të Brigadës 121, Ismet Jashari Komandant Kumanova, në Kompleksin Memorial në Kleçkë, u përkujtuan të gjithë dëshmorët e kësaj brigade. Në prezencën e mijëra qytetarëve, të pranishmëve iu drejtua kryetari i OVL të UÇK-së Muharrem Xhemajli, i cili foli për rëndësinë dhe rolin e Brigadës 121 Kumanova, duke shprehur edhe vendosmërinë e plotë, që OVL të UÇK-së, do të vazhdojë rrugën dhe idealin e Dëshmorëve të Kombit.
Në emër të Shtabit të Përgjithshëm të UÇK-së, foli Rexhep Selimi, ndërsa ish komandanti i ZO të Pashtrikut Fatmir Limaj, foli për rëndësinë e lirisë që e sollën këta dëshmorë, që i takonin çdo shtrese të popullit, si dhe angazhimet në ndërtimin e shtetit.
Të pranishmit i përshëndeti edhe kryetari i Komunës së Likovës, ndërsa në emër të familjarëve të dëshmorëve të Brigadës 121, foli Besim Qelaj, vëlla i Dëshmorit të Kombit Agim Qelaj.
Pas pjesës foljore, u mbajt një program i pasur artistik me këngë, valle e recitale.




Ndahet nga jeta atdhetari Sabit Veseli

Broboniq 7 gusht 2010
Të shtunën në vendlindjen e tij, në fshatin Broboniq të Mitrovicës, i është dhënë lamtumira e fundit atdhetarit Sabit Veseli, i cili humbi jetën tragjikisht në një aksident trafiku. Në ceremoninë e varrimit morën pjesë mijëra qytetarë, në mesin e të cilëve ishin edhe kryeministri i Kosovës, Hashim Thaçi, përfaqësuesit e OVL të UÇK-së, kryesuar nga kryetari Muharrem Xhemajli si dhe përfaqësues të tjerë të jetës publike në Kosovë.
Sabit Veseli ishte organizues i demonstratave të vitit 1981 në Mitrovicë, ku dënohet me mbi 7 vjet burg politik, e më pas i bashkëngjitet Lëvizjes Popullore për Republikën e Kosovës, ku u shqua si aktivist, udhëheqës dhe organizator. Pas themelimit të UÇK-së, Sabit Veseli dha kontribut të çmuar që në fillet e saj.
Në ceremoninë e varrimit, për veprimtarinë e Sabitit, mbajtën fjalë rasti: bashëveprimtari Ramadan Avdiu, kryeministri i Kosovës Hashim Thaçi, Valbona Fazliu në emër të fshatit të tij të lindjes, ndërkaq në emër të familjes të pranishmit i falenderoi për pjesëmarrje Hysni Veseli.
Organizata e Veteranëve të Luftës së UÇK-së, shpreh ngushëllime për familjen, veteranët e luftës dhe për të gjithë bashkëveprimtarët dhe bashkëmendimtarët e Sabitit.




Përmbyllen konsultimet për ligjin e vlerave të luftës

Prishtinë 2 gusht 2010
Në një takim të mbajtur sot me kryeministrin e Kosovës z. Hashim Thaçi, krerët e organizatave të dalura nga Lufta e UÇK-së, kanë përmbyllur konsultimet rreth projektligjit për vlerat e luftës së UÇK-së.
Në vjeshtë të këtij viti pritet që i njëjti të miratohet në Kuvendin e Kosovës, ndërsa zbatimi i tij do të fillojë që nga 1 janari i vitit 2011.




REAGIM kundër bastisjes së shtëpisë së komandantit të UÇK-së Azem Syla

Prishtinë 29 korrik 2010
Organizata e Veteranëve të Luftës së UÇK-së reagon kundër bastisjes nga ana e EULEX-it të shtëpisë së komandantit të UÇK-së Azem Syla.
Të indinjuar e të pakënaqur me këto veprime të padrejta, ne konsiderojmë se këto janë shkelje të dinjitetit të të gjithë luftëtarëve të UÇK-së.
Kjo bastisje e bërë me akuza të fabrikuara nga njerëz me të meta mendore, si dhe në koordinim me Prokurorinë e Serbisë, tregon se ky mision ka degraduar plotësisht, në një mision të njëanshëm dhe si i tillë është i panevojshëm për Kosovën.




REAGIM kundër vendimit të Dhomës së Apelit të Tribunalit për krimet e luftës në ish Jugosllavi

Prishtinë 21 korrik 2010
Organizata e Veteranëve të Luftës së UÇK-së, kundërshton vendimin e Dhomës së Apelit të Tribunalit për krimet e luftës në ish Jugosllavi, për shfuqizimin e vendimit të vitit 2008, ndaljen në paraburgim, si dhe vendimin për rigjykim të bashkëluftëtarëve tonë Ramush Haradinaj, Lahi Brahimaj dhe Idriz Balaj.
Ky vendim i padrejtë, që merret vetëm një ditë para shpalljes së mendimit të GJND-së për pavarësinë e Kosovës, është i motivuar politikisht.
Botërisht njihet dhe është argumentuar se lufta e UÇK-së ka qenë e pastër, çlirimtare, e orientuar kundër forcave të një shteti pushtues dhe gjenocidal.
Konsiderojmë se ky vendim i padrejtë është vetëm një tentim për të balansuar krimet që Serbia ka kryer në Kosovë dhe si i tillë për ne gjithmonë do të jetë i papranueshëm.
Duke besuar në pafajësinë e secilit pjesëtar të UÇK-së, ne kërkojmë lirimin e tyre të menjëhershëm.




REAGIM kundër deklaratës së zv.shefit të EULEX-it, Roj Riv, për mosdërgimin e njësiteve speciale në veri të Kosovës

Prishtinë 19 korrik 2010
Organizata e Veteranëve të Luftës së UÇK-së, e kundërshton ashpër deklaratën e fundit të zv.shefit të EULEX-it Roj Riv. Kjo deklaratë është nga më tendeciozet dhe më të dëmshmet që i kemi dëgjuar ndonjëherë nga ky mekanizëm ndërkombëtar.
Deklarimi i hapur që njësitet e EULEX-it nuk do të dërgohen në veri të Kosovës, tregon se EULEX nuk është serioz dhe po e legjitimon një ndarje të heshtur të veriut, duke e kundërshtuar direkt integritetin e Shtetit të Pavarur dhe Sovran të Kosovës dhe duke legalizuar strukturat ilegale të Serbisë.
Në qoftë se EULEX vazhdon të ndjek këtë politikë të dyftyrësisë, të dëmtimit të shtetit Sovran për të cilin derdhën gjak mijëra bashkëluftëtarë tanë, ne si Organizatë, do të shqyrtojmë mundësitë e veprimit konform situatës së krijuar.




Deklaratë për media e KD të OVL të UÇK-së

Brod - Sharr 4 korrik 2010
Këshilli Drejtues i Organizatës së Veteranëve të Luftës së UÇK-së, në mbledhjen e mbajtur me date 4 korrik 2010 në fshatin Brod të Komunës së Sharrit, përveç diskutimit dhe miratimit të raportit të punës së Kryesisë për periudhën gjashtë mujore, analizoi edhe situatën aktuale politike dhe të sigurisë në vend.
Këshilli Drejtues i OVL të UÇK-së:

• Përkrah veprimet e organeve shtetërore, për shtrirjen e pushtetit në tërë territorin e Republikës së Kosovës;
• Kërkon nga Qeveria e Kosovës që të jetë më e vendosur në mbrojtje të sovranitetit të shtetit;
• Shpreh keqardhje për humbjen e jetës së një qytetari në Mitrovicë me datë 2 korrik dhe kërkon nga organet e sigurisë që të arrestojnë kriminelët serbë të cilët hyjnë e dalin lirshëm në Kosovë;
• Kërkon nga Kuvendi i Kosovës, si organi më i lartë, që të kontrollojë punën e Qeverisë dhe të mos lejojë ndërhyrje nga askush tjetër;
• Kërkon nga të gjithë faktorët e politikës vendore që të sillen me seriozitet dhe përgjegjësi kulmore, karshi momentit nëpër të cilin po kalon Kosova.

Reagim kundër arrestimit të veteranit Rezak Imeri

Prishtinë 25 qershor 2010
Arrestimi i veteranit të luftës Rezak Imeri, është vazhdimësi e gjahut të EULEX-it, kundër atyre që kontribuan më së shumti për Kosovën.
Duke parë çdo ditë e më tepër, që ky mision nuk është duke luftuar kontrabandën dhe krimin e organizuar, si dhe tolerimin e strukturave ilegale të financuara nga Beogradi, ne besojmë që ky mision është i njëanshëm politikisht. I ardhur me mision të mbështetjes së sundimit të ligjit, EULEX, nuk e ka të qartë ende hartën e Kosovës, duke lënë pjesën veriore të saj, nën ligjin e askujt dhe duke penguar strukturat vendore që të ndërmarin masat e duhura për vendosjen e rendit dhe ligjit kushtetues në tërë territorin e Kosovës.
OVL të UÇK-së, e njohur ndërkombëtarisht dhe anëtare e barabartë e federatave të veteranëve evropian dhe botërorë, beson thellë në pastërtinë e luftës çlirimtare, e njëherësh, konsideron se arrestimet e pjesëtarëve të UÇK-së, janë të motivuara politikisht.
Duke besuar plotësisht, në pafajësinë e Rezak Imerit si dhe të tjerëve që u arrestuan me motive të njëjta, ne kërkojmë lirimin e menjëhershëm të tyre dhe ndërprerjen e represionit të EULEX-it ndaj pjesëtarëve të UÇK-së.
Dita ditës ky mision është duke e degraduar veten para popullit të Kosovës, me ç’rast edhe ne kemi shtuar nivelin e angazhimin që ky mision sa më parë të largohet nga Kosova.




Delegacioni i PDU-së viziton OVL të UÇK-së

Prishtinë 16 qershor 2010
Delegacioni i Partisë për Drejtësi dhe Unitet, i kryesuar nga kryetari Shpëtim Idrizi, ka vizituar selinë qendrore të Organizatës, ku është pritur nga kryetari Muharrem Xhemajli me bashkëpunëtorë. PDU, përfaqëson çështjen çame në Parlamentin e Republikës së Shqipërisë. Ky ishte takimi i parë i krerëve të PDU dhe OVL të UÇK-së.
Arsyeja e ardhjes këtu është përpjekja e popullit në Kosovë, e cila ka ndryshuar rrjedhat historike tha në mes tjerash z. Shpëtim Idrizi duke vazhduar Politika si këtu si në Shqipëri duhet ta ketë presionin pozitiv për të punuar sa më shumë në çështjen kombëtare. Ndërkaq kryetari i Organizatës Muharrem Xhemajli, informoi të pranishmit për organizimin e OVL të UÇK-së, misionin dhe synimet saj. Gjithashtu ai pasqyroi edhe aktivitetet e Organizatës në përputhje me Programin e saj. Mes tjerash z.Xhemajli theksoi: E tërë politika në hapësirën mbarëshqiptare duhet të punojë për kombin, në këtë rast edhe për çështjen çame, dhe të lënë anash interesat partiake dhe personale.
Palët u dakorduan për thellimin e bashkëpunimit, në të gjitha sferat me interes kombëtar.




QMFR "Nëna Naile" ndan 40 bursa për studentë

Prishtinë 8 qershor 2010
Qendra për Mjekësi Fizikale dhe Rehabilitim "Nëna Naile" Kllokot, me drejtor të përgjithshëm z.Dardan Novosella, ka ndarë 40 bursa njëvjeqare për studentë të kategorive të luftës. Kryetari i OVL të UÇK-së Muharrem Xhemajli ka falenderuar z.Dardan Novosellën për kontributin e dhënë në vazhdimësi për kategoritë e luftës së UÇK-së. "Shpresoj që edhe të tjerët që kanë mundësi të ndihmojnë, do të ndjekin shembullin e z.Dardan Novosellës" tha kryetari Muharrem Xhemajli, duke shtuar që bursat do të fillojnë të ndahen nga muaji qershor, me kohëzgjatje njëvjeqare.




Komunikatë e Këshillit Organizues të Protestës

Prishtinë 31 maj 2010
Në Mitrovicë u mbajt protesta e Organizuar nga Organizata e Veteranëve, Shoqata e Invalidëve dhe ajo e Familjeve të Dëshmorëve të Luftës së UÇK-së me moto: “Të mbrohet sovraniteti i Kosovës” e jo edhe nga ‘Lëvizja Vetëvendosje’ siç është thënë në disa media. Protesta është përkrahur në mënyrë deklarative nga disa subjekte politike opozitare dhe OJQ ndërkohë që i vetmi subjekt politik që e ka përkrahur dhe kemi pasur takim me drejtuesit kryesor të saj është ‘Lëvizja për Bashkim’.
Ne i falënderojmë protestuesit që dje ishin dinjitozë në protestën në Mitrovicë, falënderojmë gjithashtu Policinë e Kosovës e cila bashkë me ne ka kontribuar që gjendja të mos eskalojë sepse dikujt si kësaj të ashtuquajturës ‘Lëvizje’, i konvenon kacafytja me Policinë tonë siç ndodh gati në çdo protestë të tyre. Ne jemi të vetëdijshëm se për ç’do eskalim të mundshëm përgjegjësi kryesore mban organizatori nëse nuk e lajmëron protestën në Polici, në momentin kur e lajmëron, siç e kemi bërë ne, përgjegjësia është e përbashkët.
Këshilli Organizues e vlerëson protestën si të suksesshme. Në vazhdimësi do t’i përcjellim zhvillimet politike dhe reagimet tona do të jenë në përputhje me situatën.




Mbahet protesta në Mitrovicë

Mitrovicë 30 maj 2010
Mijëra qytetarë nga Mitrovica dhe mbarë Kosova, morën pjesë në protestën gjithëpopullore "Të mbrohet Sovraniteti i Kosovës". Marshimi filloi në ora 12 nga Sheshi i Jasharajve, për të vazhduar më pas deri tek sheshi "Isa Boletini". Të pranishmëve iu drejtuan kryetari i OVL të UÇK-së Muharrem Xhemajli, i cili foli për qëllimet e protestës, vuajtjet e popullatës shqiptare në veri të Kosovës, neglizhencën njëdekadëshe të faktorëve relevantë, e në mes të tjerash tha : Strukturat ilegale dhe shefat e tyre që hyjnë në Kosovë si në bashqen e vet, do të përballen me reagimin tonë. E reagimi jonë do t’i mposht e do t’i turpërojë edhe me keq sesa në vitin 1999. Do të binden që luftëtarët e lirisë janë më të fortë e me të mobilizuar se kurrë më parë.
Me një fjalë rasti të pranishmëve iu drejtua edhe Xhavit Jashari, kryetar i SHFD të UÇK-së, i cili në mes tjerash tha se shoqatave të luftës nuk iu interesojnë deklarimet e thëna apo të shkruara të qeverisë, EULEX-it, KFOR-it e partive politike, por iu intereson vetëm zgjidhja sa më e shpejtë e çështjes së veriut të Kosovës. z.Jashari tha se përgjegjësia nuk është vetëm e faktorit ndërkombëtar por edhe e institucioneve të Republikës së Kosovës.
Me gjithë disa provokimeve nga ana veriore e lumit Ibër, pas thirrjes së organizatorit, protestuesit u shpërndanë të qetë.
Lexoni fjalimin e kryetarit Muharrem Xhemajli




PROTESTË GJITHËPOPULLORE të DIELEN me 30 MAJ, ora 12:00 në MITROVICË


28 maj 2010 Këshilli Organizues i Protestës, të premten me 28 maj 2010, në konferencën për media, ka shpalosur arsyet e mbajtjes se protestës, njëherësh ka bërë ftesë të gjithë qytetarëve që të marrin pjesë masovikisht. Protesta e cila paraprakisht është e lajmëruar në Policinë e Kosovës, do të fillojë në ora 12 në Sheshin e Jasharajve në Mitrovicë, prej nga do të marshohet në sheshin Isa Boletini. Protesta do të jetë paqësore dhe e dinjitetshme.

25 maj 2010 Kryesia e OVL të UÇK-së, në mbledhjen e mbajtur sot, me datë 25 maj 2010, pas shqyrtimit të situatës politike dhe të sigurisë në Kosovë, mori vendim të kundërshtoj ashpër mbajtjen e zgjedhjeve të Serbisë në Kosovë, me këtë rast:
Njoftojmë opinionin e gjerë se me datën 30 maj 2010, në Mitrovicë, Organizatat e dala nga lufta e UÇK-së, organizojnë protestë gjithëpopullore me moto ‘ Të mbrohet sovraniteti i Kosovës’.




Reagim kundër arrestimit të Veteranit të Luftës Sabit Geci

Prishtinë 6 maj 2010
Me rastin e arrestimit të veteranit të luftës së UÇK-së Sabit Geci nga EULEX-i, të gjithë luftëtarëve të UÇK-së, iu bë me dije, nga ky mision se “lufta jonë e pastër çlirimtare konsiderohet krim dhe nuk ka asnjë vlerë”.
Duke pasur parasysh, që deri më tani, asnjë gjë pozitive nuk erdhi nga ky mision, por vetëm u përkujdes që Kosovën dhe zhvillimin e saj ta lë prapa, ne do të detyrohemi në shqyrtimin e ndërrimit të formës së reagimit.
E përkujtojmë edhe njëherë, që detyrat që i kishte ky mision, e sidomos në luftimin e kontrabandës dhe krimit të organizuar, që bëhet në pikë të ditës, në komunat veriore të Kosovës, nuk janë realizuar. Ky mision, e ka lënë të uzurpuar 18% të territorit sovran të Republikës së Kosovës, nga struktura ilegale që udhëhiqen nga Beogradi, duke mos ndërrmarrë asgjë, por edhe duke penguar që me këtë punë të merren organet vendore.
Ky mision, i lë të lirë kriminelët që morrën pjesë në terrorin dhe gjenocidin e organizuar në Kosovë nga shteti serb, i lë të lirë personat që haptazi shprehen se kanë marrë pjesë në vrasje të komandantëve të UÇK-së e që fshehen nën petkun e deputetit, e për tu mbushur kupa, krimi i organizuar dhe kontrabanda bëhet edhe nga vet pjesëtarët e EULEX-it, siç ishte rasti me policët rumun.
Në kërkojmë që Sabit Geci të lirohet menjëherë, dhe të ndërpritet ky represion që po bëhet ndaj veteranëve të luftës së UÇK-së.
Në ditët në vijim, në do të shqyrtojmë masat, që këtyre ofendimeve në formë spektaklesh, t’i përgjigjemi shumë ashpër edhe ne.
Kryesia e OVL të UÇK-së




NJOFTIM: 5 maji Dita e Dëshmorëve të Kombit

Kosovë 5 maj 2010
Me rastin e 5 Majit, Ditës së Dëshmorëve të Kombit, Organizata e Veteranëve të Luftës së UÇK-së, në të gjitha komunat, organizon homazhe e nderime për Dëshmorët. Kryesia Qendrore ndërkaç, do të merr pjesë në manifestimin që organizohet me rastin e kësaj dite në komunën e Vitisë.




Reagim: VEPRIM I GABUAR NË VEND TË GABUAR

Prishtinë 29 prill 2010
Veprimi i policisë në ditën e pashembullt, kur një popull varrosë veprimtarin e çështjes kombëtare Ali Aliu, gabim i bërë qoftë në vend apo kohë si dhe veprimet e policisë, në atë masë të paparë para institucionit që paraqet vendin e shenjtë të burimit të luftës ndaj së keqës dhe luftimit të veprave kriminale, për çka me plot sinqeritet e përkrahim edhe ne veteranët e UÇK-së, vetvetiu kuptohet se dikujt po i duhet më tepër frikësimi i popullit se sa veprimet civilizuese dhe ligjore.
OVL të UÇK-së, shprehë indinjatën e vet, ndaj këtyre veprimeve që nuk synojnë luftën ndaj së keqës por sipas të gjitha provave kanë indikacione që janë në kundërshtim me qëllimin e veprimtarisë së Policisë, të frikësimit të popullit apo te më e keqja, të ngacmimit të tij për veprime që ne nuk i dëshirojmë në asnjë mënyrë.
Veprimet e policisë së EULEX-it, në rastin e fundit, lidhur me hetimet ndaj ministrit Fatmir Limaj, jo vetëm që janë në kundërshtim të plotë me procedurën e Kodit të Procedurës Penale në Kosovë por gjithsesi, shkelin të gjitha aktet e veprimeve, qoftë humane por edhe procedurale. Asnjë veprim paraprak apo indikacion tjetër nuk ka patur policia e EULEX-it, me rastin e zhvillimit të këtyre të hetimeve, se do të përballen me farë veprimi joligjor apo që të kenë farë baze konfliktuoze. Përdorimi i gjithë asaj force, për të kontrolluar një ministri të Qeverisë së Kosovës e madje para mjeteve të informimit publik pos që paraqet rast eklatant të një veprimi të palejueshëm dhe të panevojshëm, njëkohësisht, jemi të mendimit se prapa këtij veprimi fshihet edhe qëllimi jocivilizues i trysnisë dhe frikës së popullit të Kosovës. Sikurse dihet, EULEX-si nuk e ka këtë mision në Kosovë. Andaj, vetvetiu lind dyshimi se ai po tenton që përmes kësaj forme ta mbajë në ankth popullin e Kosovës, kurse opinionin ndërkombëtar ta senzibilizojë se në Kosovë vetëm forca është zgjidhje, fakt ky krejtësisht i gabuar dhe joreal.
OVL të UÇK-së, është për sundimin e ligjit, por jo për spektakle të Policisë së Kosovës dhe Policisë së EULEX-it.
Reagimi është bërë sot, nga Kryesia e Organizatës dhe nënshkruar nga kryetari Muharrem Xhemajli.




U dorëzuan çelësat e shtëpisë se ndërtuar nga donacioni i kompanisë Buçaj dhe TEB Bankës

Shtime 28 prill 2010
Në Shtime iu dorëzuan çelësat e shtëpisë, veteranit të luftës, Ali Selimi. Në kuadër të ndërtimit të shtëpive për veteranët e invalidët e luftës, që bëhet me ndihmën e donatorëve të shumtë, në koordinim me Zyrën e Veteranëve pranë Kryeministrit, kompania Buçaj dhe TEB banka ka ofruar ndërtimin e 4 shtëpive. Këto shtëpi janë ndërtuar në komunat e Shtimes, Klinës, Mitrovicës dhe Vushtrrisë.
Kryetari i OVL të UÇK-së, Muharrem Xhemajli, duke falënderuar donatorët, inkurajoi edhe të tjerët që të bashkëngjiten në këtë aksion human në mbështetjte të atyre që kontribuan në çlirimin e Kosovës. "Kjo është një ndihmesë shumë e madhe për ne, e në veçanti për bashkëluftëtarin tonë, i cili deri më tash ka jetuar në kushte shumë të vështira" tha kryetari Xhemajli.
Në këtë solemnitet përveç donatorëve, morën pjesë edhe ministri i Integrimeve Besim Beqaj si dhe u.d. i kryetarit te OEK-ut Safet Gërxhaliu. Z.Gërxhaliu theksoi se "ky nuk është rasti i parë dhe shpresoj se nuk është edhe i fundit dhe e shfrytëzojë rastin që të falënderoj Buçaj dhe TEB Bankën për këtë hap, i cili me siguri do të jetë model edhe për kompani tjera që të kontribuojnë në përkrahje të vlerave të luftës".




Shënohet dita e fillimit të luftës në Zonën e Pashtrikut

Drenoc 26 prill 2010
Në Drenoc të Rahovecit, u mbajt një manifestim ku u shënua dita e fillimit të luftës në Zonën e Pashtrikut. Në manifestim të pranishmëve, përveç tjerëve iu drejtuan edhe kryetari i Komunës së Rahovecit Qazim Qeska, si dhe nënkryetari i Organizatës Smajl Elezaj. Duke shpjeguar rëndësinë e kësaj dite për masovizimin e luftës së UÇK-së, mes tjerash Smajl Elezaj tha: "UÇK-ja me luftën e saj kishte arritur me sukses të sfidonte makinerinë vrastare serbe, në një anë dhe një pjesë të opinionit të brendshëm që po tregonte mospërfillje dhe jokoshiencë për rrjedhën dramatike të ngjarjeve, mbase edhe nostalgji për platformën absurde të pacifizmit në një kohë kur në Kosovë kishte nisur lufta e armatosur shqiptaro-serbe".
Pas pjesës foljore, u mbajt edhe një program i pasur artistik, si dhe u zbulua një pllakë përkujtimore për Dëshmorët e Kombit.




Delegacioni i OVL të UÇK-së po merr pjesë në konferencën e KEVL - CEAC

Paris 22-24 prill 2010
Delegacioni i Organizatës i përbërë nga Muharrem Xhemajli kryetar dhe Fatmir Shurdhaj nënkryetar, po qëndron në Paris, në një konferencë treditore të organizuar nga Konfederata Evropiane e Veteranëve të Luftës - CEAC. Në punimet e konferencës, duke u vlerësuar puna e KEVL-CEAC, u kërkua një bashkëpunim më i madh në mes të vendeve anëtare. Gjithashtu, në konferencë, u vlerësua roli i OVL të UÇK-së dhe bashkëpunimi i saj me organizatat e tjera mbarë Evropës.
Gjatë qëndrimit në Francë, delegacioni i Organizatës, u takua edhe me veteranë të luftës dhe bashkëatdhetar që jetojnë atje.




NJOFTIM: Manifestimi "Ditët e Krenarisë"

Prishtinë 17-24 prill 2010
Degët e Organizatave të dala nga lufta e UÇK-së në Prishtinë, në bashkëpunim me komunën e Prishtinës dhe asociacione të tjera, organizojnë Manifestimin "Ditët e Krenarisë".
Agjenda e Manifestimit:
17 prill:
Ora 10:00 Aktivitet sportiv “Krosi i Krenarisë” zhvillohet në Sheshin Nëna Terezë, në bashkëpunim Shoqatën e Pedagogëve, pjesmarrës nxënësit e shkollave të mesme dhe fillore të kryeqytetit.
Ora 11.00 Gara në Shenjëtari. Në bashkëpunim me Federatën e Shenjëtarisë së Kosovës, duke vazhduar traditën, organizohet garë në shenjëtari “Kupa e Krenarisë në Shenjëtari”, për nder të Dëshmorëve të Kombit.
Ora 12.00 Në grupe të organizuara në bashkëveprim me profesorët dhe nxënësit e shkollës në kryeqytet, bëhen vizita në të gjitha familjet e dëshmorëve.
18 prill:
Ora 10:00 Homazhe në Varrezat e Dëshmorëve në Prishtinë
Ora 10:45 Vendosja e luleve pranë përmendores së Zahir Pajazitit
Ora 11:00 Në formë të organizuar në bashkëpunim me bashkëqytetarët bëhet dhurimi i gjakut, në sheshin Zahir Pajaziti.
Ora 13:00 Në Viti të Marecit mbahet manifestim për nder të Dëshmorëve të Kombit.
Ora 14:45 Homazh në fshatin Mramor, në Varrezat e Dëshmorëve dhe Martirëve
Ora 15:15 Homazh në fshatin Makoc, ku janë të varrosur civilët që u vranë nga forcat serbe
Ora 16:30 Homazh në fshatin Sharban, pranë Përmendores së Dëshmorëve
Ora 18:00 Akademia Përkujtimore Pallati i Rinisë Salla e Kuqe
19 prill:
Ora 13:00 Veteranët e Luftës, përfaqësuesit komunal dhe bashkëqytetarët, do të mbjellin fidane në mes të Bulevardit të Dëshmorëve dhe rrugës 28 Nëntori ( kryqëzimi para ndërtesës së PTK-së pjesa e gjelbëruar)
19-24 prill
Ora 17:00 organizohet turnir i futbollit “Kupa e Krenarisë në Futboll”. Mjetet materiale që grumbullohen në turnir dedikohen për qëllime humanitare.




Reagim kundër vendimit të Gjykatës Kushtetuese rreth emblemës së Prizrenit

Prishtinë 6 prill 2010
Kryesia e Organizatës, në një mbledhje të mbajtur sot në Prishtinë, ka reaguar kundër vendimit të Gjykatës Kushtetuese rreth emblemës së Komunës së Prizrenit..
Tekstin e plotë e lexoni në rubrikën Komunikata.