Një Komb
Një Atdhe
Një Gjuhë
Një Flamur

REAGIM (me rastin e vazhdimit te gjykimit, rasti Kleçka)

Prishtinë 6 shkurt 2012
Vazhdimi i gjykimit të bashkëluftëtarëve tonë të Brigadës 121 Kumanova, argumenton prapë se EULEX-i në bashkëpunim me Serbinë, po vazhdon lojërat politike kundër vlerave të luftës sonë çlirimtare, duke tentuar të dëmtojnë kombin shqiptar, të ardhmen dhe pozicionin e tij në mesin e kombeve të tjera. Lufta e ashpër politike kundër vlerave më të larta të popullit tonë, tenton mohimin e sakrificës së mijëra dëshmorëve e luftëtarëve të lirisë.
Në procesin “Kleçka”, të cilin jemi duke e përcjellur me shqetësim të madh, shohim se si është degraduar “drejtësia ndërkombëtare”, pasiqë në bankat e të akuzuarve gjindet luftëtarët që me kontributin e tyre e ndaluan masakrën në 85.000 civilë në Malet e Berishës. Mbase ky kontribut i tyre, ka motivuar Serbinë që të inicoj në EULEX, process të montuar politik pikërisht kundër këtyre luftëtarëve të lirisë.
Ne kemi argumentuar vazhdimisht se EULEX është i padobishëm dhe i panevojshëm të qëndrojë në Kosovë, sepse asnjëherë nuk arriti të kryej detyra për të cilat ka ardhur, dhe asnjëherë nuk arriti të jetë mission i paanshëm.
Ne besojmë në pafajësinë e luftëtarëve të UÇK-së dhe konsiderojmë se shfaqja e “dëshmitarëve anonim”, bëhet vetëm për përfitime të tyre materiale dhe për interesa të Serbisë. Të jenë të bindur se secili që tenton të bëhet pjesë e këtyre lojërave kundër UÇK-së, përveç se nuk do të realizojë qëllimin e përfitimit material, prapa do të lë vetëm turpin për familjen dhe pasardhësit. Andaj, ne bëjmë thirrje që të heqin dorë nga shpifjet dhe intrigat kundër luftëtarëve të lirisë.




FALENDERIM për QMFR "Nëna Naile"

Prishtinë 11 janar 2012
Kryesia e OVL të UÇK-së, falenderon Qendrën për Mjekësi Fizikale dhe Rehabilitim “Nëna Naile” Kllokot dhe pronarin Dardan Novosella, për mbështetjen e vazhdueshme për fëmijët e veteranëve të luftës, që janë në vijim të studimeve.
Edhe këtë vit, QMFR “Nëna Naile” ka ndarë 40 bursa për fëmijë të veteranëve, donacion ky që është bërë traditë e kësaj qendre.
OVL të UÇK-së, fton për bashkëpunim edhe kompanitë e tjera, që dëshirojnë ta ndjekin shembullin e mirë të z.Dardan Novosellës, në ndihmë të kategorive që kontribuan më së shumti për Kosovën.




Dita e Veteranit shënohet me Protestë

Prishtinë 30 dhjetor 2011
OVL të UÇK-së së bashku me SHFD dhe SHIL të UÇK-së, mbajtën protestën e parë për miratimin e një ligji të mirefilltë për vlerat e luftës. Protesta, që u mbajt në Ditën e Veteranit, u zhvillua pas shterjes së të gjitha mundësive ligjore.
Pjesëmarrja ishte masive, më e madhja deri me tani. Thirrjes së OVL të UÇK-së, iu përgjigjen rreth 15.000 luftëtarë e familjarë të dëshmorëve.
Organizimi i mirë, serioz, i disiplinuar dhe masiv, dergon mesazh të qartë tek institucionet e vendit, që Organizatat e Luftës, nuk do të ndalen deri në realizimin e kërkesave.
Në fjalimin e rastit, z.Muharrem Xhemajli, sqaroi se as pas qindra takimeve dhe harmonizimit të qëndrimeve, Qeveria, Kuvendi e Presidenca, nuk janë të interesuara që të zgjedhin njëherë e përgjithmonë çështjen e luftës çlirimtare dhe kategorive të dalura nga kjo luftë.
Defilimi i protestuesve u bë në rrugët: Garibaldi, Nëna Tereze, Agim Ramadani, Eqrem Qabej dhe Xhorxh Bush, dhe zgjati nga ora 12 deri ne 13:20.
Protestat do të vazhdojnë. Luftëtarët dhe familjet e dëshmoreve nuk do të ndalen.




Njoftim i Këshillit Organizues të Protestës

Prishtinë 28 dhjetor 2011
Në konferencën për media të mbajtur sot në Prishtinë, drejtuesit e OVL, SHFD dhe SHIL të UÇK-së, kanë shpalosur detalet e Protestës së 30 dhjetorit 2011.
Kryetari i Organizatës së Veteranëve të Luftës së UÇK-së, Muharrem Xhemajli, ka bërë me dije se vendimi që Dita e Veteranit sivjet të shënohet me Protestë për mbrojtje të vlerave të luftës, është marë nga organet më të larta të OVL të UÇK-së. Gjithashtu z.Xhemajli ka thënë se kjo protestë nuk është e fundit dhe do të vazhdohet me këto protesta deri në miratimin e ligjit të mirëfilltë për kategoritë e luftës. Njëherësh ai ka bërë ftesë që të gjithë veteranët të bashkëngjiten në Prishtinë, të premten me 30 dhjetor 2011, në ora 12. Takimi i protestuesve do të bëhet tek parkingu pas Pallatit të Rinisë.
Kryetari i Shoqatës së Invalidëve të Luftës së UÇK-së, z.Fadil Shurdhaj, ka thënë se në mbledhjen e Kryesisë së SHIL, është vendosur të përkrahet protesta dhe njëherësh ka bërë thirrje që të gjithë invalidët e luftës të jenë pjesë e protestës.
z.Xhavit Jashari, kryetar i Shoqatës së Familjeve të Dëshmorëve të UÇK-së, ka thënë se edhe në takimin me kryetarët e degëve të kësaj shoqate, është marë mbështetje e plotë për protestën dhe se në asnjë mënyrë nuk do të lejohet që të shkelen vlerat e luftës dhe dinjiteti i luftëtarëve të lirisë, invalidëve e Dëshmorëve të Kombit. Ai pasi ka adresuar një varg kritikash për qeverinë dhe deputetët e Kuvendit të Kosovës, ka bërë thirrje që të gjitha familjet e dëshmorëve të jenë pjesë e protestës të premten.




Protestë me 30 dhjetor 2011

Prishtinë 23 dhjetor 2011
Këshilli Drejtues i OVL të UÇK-së, në mbledhjen e mbajtur sot me 23 dhjetor 2011, ka kundërshtuar unanimisht ligjin për vlerat e luftës së UÇK-së, të miratuar më parë nga Kuvendi i Kosovës. Njëkohësisht Këshilli Drejtues, si organ më i lartë i Organizatës, kërkon nga presidentja Jahjaga, që të marë parasysh kërkesën e Kryesisë së OVL të UÇK-së, për mosnënshkrim të ligjit dhe kthimin e tij për rishqyrtim në Kuvend.
Këshilli Drejtues, ka vendosur që 30 dhjetorin – Ditën e Veteranit të UÇK-së, ta shënojë me një protestë paqësore, për shkak të injorimit të kërkesave të veteranëve, për një ligj të mirëfilltë.
Protesta mbahet me 30 dhjetor 2011, në Prishtinë dhe fillon në ora 12:00. Për detajet e protestës, veteranët do të informohen në ditët në vijim.




REAGIM kundër transmetimit së intervistës së Nazim Bllacës, në emisionin e RTK-së “Drejtësia në Kosovë”

Prishtinë 30 nëntor 2011
Ne veteranët e UÇK-së jemi tepër të indinjuar me rastin e transmetimit të intervistës së Nazim Bllacës në emisionin e quajtur “Drejtësia në Kosovë”, në RTK, në vigjilie të festave të Nëntorit.
Ne konsiderojmë se do të ishte shumë më e arsyeshme që të transmetohen emisione edukative, kulturore e arsimore, në lidhje me festat e Nëntorit: Shpalljen e Pavarësisë së Shtetit Shqiptar, ditëlindjen e Komandantit Legjendar Adem Jashari, si dhe daljen publike të UÇK-së.
Nëse do të ishte e domosdoshme të transmetohej emisioni “Drejtësia në Kosovë” për shkak të orarit të transmetimit, atëherë më mirë dhe më e arsyeshme do të ishte që në këtë emision të flitej për padrejtësitë të cilat po u bëhen pjesëtarëve të Ushtrisë Çlirimtare të Kosovës në emër të drejtësisë, prej përfundimit të luftës e deri më tani. Dihet që kemi me dhjetëra raste të arrestimeve të lufëtarëve të lirisë, të mbajtur me vite të tëra në qendrat e paraburgimit, të gjykuar, të liruar të pafajshëm e të dënuar pa fakte e argumente ligjore.
Konsiderojmë se dhënia hapësirë e njerëzve si Nazim Bllaca në mediumet publike e aq më tepër në vigjilie të festave kombëtare, është denigruese, fyese dhe tendencioze kundër UÇK-së dhe kombit shqiptar në përgjithësi.
Ne u rikujtojmë të gjithë ushtarëve të Ushtrisë Çlirimtare të Kosovës se kur janë radhitur në radhët e UÇK-së, kanë dhënë një betim që vlen edhe sot, në fund të të cilit thuhet: “Nëse shkel këtë betim, le të ndëshkohem me ligjet më të ashpra të luftës dhe nëse tradhtoj, qoftë i humbur gjaku im. Betohem!”.




URIM për festat e Nëntorit

Prishtinë 26 nëntor 2011
Organizatat e dalura nga Lufta e UÇK-së, ua urojnë të gjithë shqiptarëve 28 Nëntorin, me shpresë për ditë sa më të ndritshme për Kombin Shqiptar.
Gjithashtu, ftojmë qytetarët që këtë festë të shumëfisht kombëtare, Ditën e Flamurit Kombëtar, ditën e daljes publike të UÇK-së, që njëherësh është edhe Ditëlindja e Komandantit Legjendar Adem Jashari, ta festojmë së bashku, në Koncertin Festiv, me 28 nëntor ora 12:00 në Prishtinë, para Teatrit Kombëtar, me artistë të shquar të skenës muzikore shqiptare.




Reagim

Prishtinë 11 nëntor 2011
EULEX-i në bashkëpunim me Serbinë, po vazhdon lojërat politike që më herët i filloi UNMIK-u, kundër vlerave të luftës sonë çlirimtare, duke tentuar të dëmtojnë kombin shqiptar, të ardhmen dhe pozicionin e tij në mesin e kombeve të tjera. Lufta e ashpër politike kundër vlerave më të larta të popullit tonë, tenton mohimin e sakrificës së mijëra dëshmorëve e luftëtarëve të lirisë.
Duke besuar thellë në luftën çlirimtare dhe në pafajësinë e shokëve, Organizata e Veteranëve të Luftës së Ushtrisë Çlirimtare të Kosovës, fillimin e gjykimit kundër veteranëve të luftës, të quajtur “Rasti Kleçka”, e sheh si vazhdimësi e gjyqeve të Millosheviqit. Mënyra se si u zhvillua I tërë ky proces, duke u shërbyer me dëshmitar të rrejshëm e të shantazhuar, që detyrohen të bëjnë vetëvrasje, tregon se metodat e gjyqësisë serbe, ende praktikohen në Kosovë. Mbajtja në arrest, e atyre që gjithëherë ishin të gatshëm të sakrifikohen për këtë vend, që gjithëherë ishin të gatshëm të përballen edhe me “drejtësinë” e instaluar nga caqet antishqiptare që nga viti 1999, tregon se misioni i EULEX-it është i përcaktuar qartë kundër vlerave më sublime dhe kundër kombit shqiptar në përgjithësi.
Duke e konsideruar të panevojshëm këtë mision, ne si Organizatë, ripërsëritim kërkesën që të hiqen kompetencat ekzekutive të këtij misioni famkeq dhe të ndërpritet njëherë e përgjithmonë gjahu i shtrigave kundër luftëtarëve të UÇK-së.




Përfundon projekti i pushimeve verore

Prishtinë 26 gusht 2011
Organizata e Veteranëve të Luftës së UÇK-së, e mbështetur nga Qeveria e Kosovës, nga 2 korriku 2011 e deri më 26 gusht 2011, ka dërguar në pushime verore rreth 800 veteranë të luftës nga të gjitha komunat e Kosovës, si dhe nga Kosova Lindore dhe Republika e Shqipërisë.
Veteranët qëndruan në Durrës, secili në kohëzgjatje prej 10 ditësh dhe patën rastin të shijojnë bregdetin shqiptar. Ata u vizituan nga kryetari i Organizatës, z.Muharrem Xhemajli, zv.ministri i MPMS Fatmir Shurdhaj, si dhe nga një numër personalitetesh nga jeta politike.
Gjithashtu me përkrahjen e qeverisë, 70 veteranë të luftës do të dërgohen në banjat e Pejës dhe Kllokotit, në periudhën shtator - dhjetor 2011.




Komunikatë

Prishtinë 6 gusht 2011
Organizata e Veteranëve të Luftës së UÇK-së mbështet marrëveshjen e arritur mes Qeverisë dhe KFOR-it për menaxhimin e situatës në veri të Kosovës. Duke qenë gjithëherë në përcjellje të situatës, OVL të UÇK-së kërkon nga Qeveria e Kosovës që me asnjë çmim të mos kthehet prapa, pasiqë pasojat do të jenë të paparashikueshme për tërë rajonin. Veteranët e luftës janë të gatshëm në çdo moment që të mobilizohen në mbrojtje të sovranitetit të Kosovës.
Tani është koha që të fillohet me zhbërjen e strukturave kriminale të Serbisë dhe arrestimin e të gjithë kriminelëve që vite me radhë penguan zbatimin e ligjit dhe rendit në komunat veriore të Kosovës.
Ne kemi pasur dhe vazhdojmë të kemi besim në qeverinë dhe KFOR-in, që do të punojnë në bazë të mandatit të tyre, në shtrirjen e sovranitetit dhe ligjshmërisë në tërë territorin e Kosovës.




Reagim kundër dënimit të bashkëluftëtarëve

Prishtinë 30 korrik 2011
Organizata e Veteranëve të Luftës së UÇK-së është e indinjuar me veprimet e fundit të EULEX-it. Ky mision është vënë plotësisht në shërbim të Serbisë dhe politikës së saj gjenocidale. Dënimi i eprorëve dhe luftëtarëve të UÇK-së, Sabit Geci, Riza Alija, Shaban Hoti e Haki Rexhepi, argumenton qartë degradimin e këtij misioni në të gjitha aspektet, prej atij profesional e deri tek ai moral.
Derisa Kosova dhe populli i saj cenohet nga agresioni i bandave kriminale serbe, EULEX na argumenton se qëllimi kryesor i këtij misioni na qenka përkrahja e Serbisë dhe pengimi i institucioneve të Kosovës. Politika e demonizimit të luftëtarëve të lirisë, me akuza të rrejshme të përgaditura nga Beogradi dhe kolaboracionistët, e qartëson edhe më tutje pozicionin e EULEX-it dhe panevojshmërinë e ekzistencës së këtij misioni.
Duke besuar fuqishëm në pastërtinë e luftës dhe pafajësinë e bashkëluftëtarëve, ne kërkojmë lirimin e tyre të menjëhershëm.




Komunikatë

Prishtinë 28 korrik 2011
Duke parë interesimin dhe kërkesën e veteranëve të luftës për mobilizim, me qëllimin që të japin mbështetje për Policinë e Kosovës, në mbrojtje të vendit, Organizata e Veteranëve të Luftës së UÇK-së, apelon të gjithë bashkëluftëtarët të mbajnë qetësi dhe mos të bien pre e provokimeve nga grupet e ndryshme.
Ne jemi në përcjellje të vazhdueshme të zhvillimit të ngjarjeve dhe për çdo gjë do të ju informojmë me kohë.




KËRKESË DEPUTETËVE

Prishtinë 27 korrik 2011
Organizatat e Luftes se UÇK-se, i derguan nje kerkese secilit deputet te Kuvendit te Kosoves, ne lidhje me verejtjet e organizatave ne projektligjin e vlerave te luftes.
TEKSTI I PLOTE I KERKESES:
I nderuari deputet
Siç dihet, këto ditë në Kuvendin e Republikës së Kosovës, do të diskutohet dhe shqyrtohet PROJEKTLIGJI PËR STATUSIN DHE TË DREJTAT E DËSHMORËVE, INVALIDËVE, VETERANËVE, PJESËTARËVE TË USHTRISË ÇLIRIMTARE TË KOSOVËS, VIKTIMAVE CIVILE DHE FAMILJEVE TË TYRE.
Organizatat e dala nga lufta e Ushtrisë Çlirimtare të Kosovës, kërkojnë nga Ju, që të ngritni zërin, në mbrojtje të atyre që luftuan për lirinë e popullit. Ne kërkojmë që të futen të gjitha të drejtat dhe benificionet e veteranëve dhe pjesëtarëve të UÇK-së, pasi që në këtë projektligj nuk parashihen.
Në nenin 12 paragrafi 2 thuhet: ‘Të drejtat në benficione për veteranët e UÇK-së si dhe kriteret e kualifikimit për njohjen dhe realizimin e tyre do të rregullohen me Ligj të veçantë’. Kjo për ne është e paparanueshme dhe propozim i yni është që të precizohen të drejtat dhe benificionet e veteranëve dhe pjesëtarëve të UÇK-së edhe pse jemi të vetëdijshëm se ka implikime buxhetore, prandaj propozojmë që të bëhet një nen ku thuhet se: pjesa që ka të bëjë me benificionet e Veteranëve dhe Pjesëtarëve, të filloj së zbatuari pas verifikimit dhe kategorizimit të tyre dhe për këtë të caktohet një afat kohor jo më shumë se gjashtë muaj, nga miratimi i ligjit. Verifikimi të bëhet edhe për Invalidët dhe Dëshmorët.
Neni 3 paragrafi 1.6 “Dëshmorë i Kombit” është pjesëtari i UÇK-së, që ka rënë në luftë për lirinë e vendit në vitet 1998-1999”. Ne kemi vërejtje në kufizimin e periudhës kohore dhe propozojmë që për dëshmorët e UÇK-së, periudha kohore të jetë prej 30 dhjetori 1991 e deri më 19 shtator 1999 kur është bërë demobilizimi i UÇK-së, ndërsa në rastet kur ndonjë veteran, ka vdekur si pasojë e plagëve të marrura gjatë luftës, të vlejë periudha 3 vite pas lufte.
Neni 3 paragrafi 1.15. “Person civil i zhdukur”, nënkupton personin vendndodhja e të cilit është e panjohur për familjarët e tij/saj dhe i cili në bazë të informacionit të besueshëm, është zhdukur në periudhën mes 1 janarit 1998 dhe 31 dhjetorit 2000, si pasojë e luftës në Kosovë në vitet 1998-1999.
Kërkojmë që ky paragraf, i cili ka kundërthënje brenda për brenda tij, të hiqet komplet pasiqë është miratuar ligji për personat e zhdukur.
Për vërejtjet dhe sygjerimet tjera, shpresojmë se do të jemi në kontakt pas leximit të parë.




KOMUNIKATË

Prishtinë 26 korrik 2011
Organizata e Veteranëve të Luftës së UÇK-së e përshëndet vendimin e qeverisë dhe aksionin e Ministrisë së Punëve të Brendshme, për vendosjen e rendit në pikat doganore 1 dhe 31. Është obligim i institucioneve të shtetit, ruajtja e rendit dhe sovranitetit në tërë territorin, dhe veprimin e fundit ne e konsiderojmë si veprim të zakonshëm të shtetit në kryerjen e detyrave të veta.
Duke inkurajuar institucionet shtetërore që të vazhdojnë me ruajtjen e sovranitetit, ne ju bëjmë thirrje që të mos bien në presionet e EULEX-it, mision i cili me deklaratat e tij edhe njëherë u dëshmua i dëmshëm për Kosovën dhe i paaftë në realizimin e asaj për çka është ftuar. Tendenca që EULEX të pengojë një aksion legjitim për rendin dhe ligjin, është vetëm përpjekje për mbrojtje të strukturave kriminale serbe, detyra e të cilave është kontrabanda dhe krimi i organizuar. Siç shihet mosfunksionimi i shtetit ligjor në terë territorin e Kosovës, i konvenon EULEX-it për të zgjatur deri në pafundësi mandatin e tij në Kosovë.
OVL të UÇK-së, është duke përcjellur me kujdes zhvillimet e fundit, e bën thirrje që populli i Kosovës e në veçanti veteranët të mos bien në asnjë lloj provokimi, pasiqë janë institucionet e shtetit ato që menaxhojnë situata të tilla. Gjithsesi, në rast të nevojës për mobilizim të veteranëve, veteranët do të jenë të gatshëm të përgjigjen në çfarëdo lloj sfide, në mbrojtje të interesave të vendit.




Reagim ndaj përmbajtjes së projektligjit për vlerat e luftës

Prishtinë 22 korrik 2011
Kryesia e Organizatës së Veteranëve të Luftës së UÇK-së, është e indinjuar thellë në lidhje me përmbajtjen e projektligjit të vlerave të luftës që sot u procedua në Kuvend nga Qeveria e Kosovës. Projektligji që është proceduar sot, nuk është ai në të cilin disa vite me radhë është punuar nga Organizatat e Luftës së UÇK-së dhe komisioni qeveritar.
Në bazë të këtij projektligji që sot është proceduar në Kuvend nga ana e Qeverisë, të drejtat e veteranëve të luftës nuk janë përfshirë fare, me arsyetim se për ta do të bëhët nje ligj i veçantë. Gjithashtu janë të përjashtuar dëshmorët e kombit që kanë rënë para vitit 1998, heronjtë Zahir Pajaziti, Edmond Hoxha, Luan Haradinaj, Adrian Krasniqi e të tjerë.
Nuk ka të drejtë asnjë qeveri, kushdo që të jetë, t’i ndajë veteranët nga bashkëluftëtarët e tyre invalidë dhe dëshmorë të kombit.
Organizata e Veteranëve të Luftës së UÇK-së, do të informoj me kohë bashkëluftëtarët dhe opininion e gjerë, rreth masave që do të merren në kundërshtim të padrejtësisë së radhës që po bëhet ndaj veteranëve.